Азнакайда «Татар малае, татар кызчыгы – 2025» бәйгесенә йомгак ясалды. Ул районда бишенче елын уздырыла.
«Ак калфак» иҗтимагый оешмасы һәм район мәгариф, мәдәният идарәсе ярдәме белән оештырылган 6-7 яшьлек малай һәм кызлар арасында «Татар малае татар кызчыгы – 2025» бәйгесенә йомгак ясалды. Шәһәребезнең иң уңган, иң талантлы 28 баласы: 16 кыз 12 малай көч сынашты.
Бәйгене йомгаклау тантанасында район башлыгы Марсель Шәйдуллин, район башкарма комитеты җитәкчесе урынбасары Дамир Гыйләҗев, Азнакай шәһәренең хатын-кызлар советы җитәкчесе Эльвирв Галиева, мәгариф идарәсе җитәкчесе Зөлфия Гыйләҗева, мәдәният идарәсе җитәкчесе Гөлсинә Хафизова, Балалар бакчалары хезмәткәрләре, ветераннар, әти-әниләр һәм әлбәттә балалар үзләре катнаштылар.
«Әлеге бәйге гореф-гадәтләребезне киләчәк буыннарга җиткерү, туган телебезгә мәхәббәт тәрбияләү, халкыбызның асыл сыйфатларын саклауда зур әһәмияткә ия», – диде район башлыгы Марсель Шәйдуллин һәм сабыйларда шундый асыл сыйфатлар тәрбияләгән һәркемгә үзенең олы рәхмәтен белдерде.
Бәйрәм тантанасында балаларның искиткеч матур чыгышларын карап, тамашачылар таң калдылар. Бүләкләү мизгелләре тагын да күңеллерәк булды. Әлбәттә инде, кемнәрнең җиңү яулавы кызыксындырадыр